అష్ట సోమేశ్వర దేవాలయాలు Testing

శ్రీఅన్నపూర్ణ సమేత విశ్వేశ్వరస్వామి – బ్రహ్మపురి

అశ్వనినక్షత్రం – ప్రథమచరణం

ఈ క్షేత్రము వృద్ధగౌతమి నదీతీరాన విలసిల్లియున్నది. ఈ క్షేత్రము చేరుటకు యానాం – ద్రాక్షారామ రహదారి యందలి ఇంజరం నుండి వెళ్ళవచ్చును. లేదా యానాం గోదావరి వంతెన నుండి గట్టుమీదుగా కోటిపల్లి వైపు మూడు నాలుగు కిలోమీటర్ల దూరంలో కలదు.ఈ క్షేత్రము నక్షత్ర శివాలయాలలో మొట్టమొదటి నక్షత్రము అశ్వని నక్షత్రపు ప్రథమ చరణమునకు చెందినది. ఈ నక్షత్రమున జన్మించిన వ్యక్తులు ఈ ఆలయాన్ని సందర్శించి అర్చన, అభిషేకాదులు నిర్వహించిన ఎడల వారి సమస్త గ్రహపీడలు తొలగి సుఖవంతులగుదరని భక్తుల ప్రగాఢ విశ్వాసం.

నక్షత్ర శివాలయాలలో మొదటిదైన ఈ ఆలయమునకు మరియు గ్రామమునకు విశేష పూర్వచరిత్ర కలదు. పూర్వము రావణుడు ప్రతిరోజూ ప్రాతఃకాలమున వెయ్యి శివలింగాలను పూజించేవాడు. అతని వధనానంతరము ఆ శివలింగాలను ఆ విధంగా పూజించేవారు ఎవరూ లేక కాశీ గంగా నదీజలాల్లో కలిపివేశారట. ఆ లింగాలు అప్పుడప్పుడు జాలర్లకు దొరుకుతుండేవట. 1958వ సంవత్సరంలో కీ.శే. శ్రీ చంద్రాభట్ల వెంకటరామశాస్త్రిగారు కాశీ వెళ్ళినప్పుడు జాలర్లు గంగానదిలో లభించిన ఒక శివలింగం (నర్మదబాణం) తెచ్చినారు. అప్పుడే “బ్రహ్మపురి” గ్రామంలో నిర్మించబడుతున్న శివాలయంలో ఆ లింగమును ప్రతిష్ఠించినారు. ఈ లింగము స్వతస్సిద్ధముగా మూడు విభూతిరేఖలను, మూడవ కన్నును కలిగియుండుట ప్రత్యేకత. భక్తితో ఈ శివుని అర్చించిన వారికి తమ తమ కోరికలు నెరవేరుతున్నాయని ఆయాభక్తుల అనుభవాలు.

పార్వతీ పరిణయ సమయంలో బ్రహ్మగారి ఒకతలలోని కండ్లు మోహదృష్టితో పార్వతిని చూచుచుండుటను చూచిన పరమేశ్వరుడు చేతితో కొట్టగా ఆ శిరస్సు బ్రహ్మనుండి వేరైనదేగాని శివుని చేతి నుండి బ్రహ్మ హత్య కారణంగా తల ఊడలేదు. శంకరుడు పవిత్రనదీ జలాలలో స్నానం చేస్తూ వచ్చి ఈ గ్రామము వద్ద గౌతమీ నదిలో మునిగి లేచే సరికి శివుని చేతి నుండి బ్రహ్మగారి తల విడిపోయిందట. ఆ కారణం చేత ఈ గ్రామానికి “బ్రహ్మపుర్రె” అని పేరువచ్చి కాలక్రమంగా మార్పులు వచ్చి ఇప్పుడు “బ్రహ్మపురి”గా పిలువబడుచున్నది. ఇది స్థల పురాణం. ఈ ఆలయము ప్రవేశ ద్వారమునకు ముందు ఆంజనేయస్వామి వారి విగ్రహము దర్శనమిస్తూ భక్తులకు స్వాగతం చెబుతున్నట్లుగా అనిపిస్తుంది. ఆలయం లోపల శ్రీఅన్నపూర్ణా సమేత విశ్వేశ్వరస్వామితో పాటు మహాగణపతి, శ్రీదేవి, భూదేవి సమేత కేశవస్వామి, వెంకటేశ్వరస్వామి, స్వామి అయ్యప్ప మరియు షిరిడీసాయినాథుని ఉపాలయము కలవు.

ఈ గ్రామమందు ఈ ఆలయం కాక శ్రీ వేణుగోపాలస్వామివారి ఆలయం కూడా కలదు. మాఘబహుళ ఏకాదశి నుండి పాంచాహ్నికంగా శ్రీ అన్నపూర్ణా సమేత విశ్వేశ్వరస్వామితో పాటు శ్రీదేవి, భూదేవి సమేత కేశవస్వామి మరియు వేణుగోపాలస్వామివార్ల దివ్య కల్యాణములు నిర్వహింపబడుట విశేషము. ఈ ఆలయం శ్రీ రామమడుగుల వెంకటరత్న సోమయాజులుగారిచే నిర్మించబడినట్లు బ్రహ్మశ్రీ చంద్రాభట్ల వెంకటరామశాస్త్రిగారు ఆలయమునకు స్థలము దానంగా ఇచ్చినట్లు అలాగే శ్రీమతి కాకర్లపూడి వెంకట నరసమ్మగారు ధూప దీప నైవేద్యముల నిమిత్తము మాగాణి భూమిని సమకూర్చినట్లు ఇచ్చటి శిలాఫలకం ద్వారా తెలియుచున్నది. అనేక సంవత్సరములుగా ఈ ఆలయ అభివృద్ధి కార్యక్రమములను శ్రీయుతులు సాగివెంకట సూర్యనారాయణరాజుగారి కుటుంబీకులు మరియు గ్రామంలోని ఇతర భక్తులు నిర్వహిస్తున్నారు.

శ్రీ బాలా త్రిపుర సుందరీ సమేత భవానీ శంకరుడు – ఉప్పుమిల్లి

ఆశ్వనినక్షత్రం – ద్వితీయచరణం

ఈ క్షేత్రము చేరుటకు యానాం – ద్రాక్షారామం ప్రధాన రహదారి నుండి మార్గము కలదు. ప్రధాన రహదారి వద్ద దిగి లోనికి వెళ్ళిన యెడల ఈ ఆలయమునకు చేరవచ్చును. ఉప్పుమిల్లి గ్రామమునకు విస్తృత రవాణా సౌకర్యము కలదు. ఈ క్షేత్రము నక్షత్ర శివాలయాలలో మొదటిదైన అశ్వని నక్షత్రం రెండవపాదానికి చెందినది. ఈ జాతకులు ఈ క్షేత్ర స్థిత శ్రీ బాలాత్రిపుర సుందరీ సమేత భవానీ శంకరస్వామిని దర్శించి అర్చనాభిషేకములు నిర్వర్తించిన విశేష ఫలితములుండునని భక్తుల విశ్వాసము.

ఈ క్షేత్రమునకు సంబంధించి విశేషమైన స్థలపురాణం కలదు. కలియుగారంభ సమయమున దేవతలకు మునీశ్వరులకు ఋషీశ్వరులకు స్నాన సంధ్యా వందనాది జప తపాదులకు పవిత్ర జలము లేనందున భగీరథుడు అను మహాముని ఆకాశగంగ కొరకై శివుని గూర్చి ఘోరమైన తపస్సు చేసెను. అందులకు శంకరుడు మెచ్చి ఆకాశగంగను తన శిఖనందు బంధించి జడపాయ ద్వారా కొంత జలమును క్రిందకు వదులసాగెను. ఆ జలమును మానవ క్షేమమునకై సప్తమహాఋషులు ఒక్కొక్కరూ ఒక్కో ప్రదేశమునకు ఆ గంగను తీసుకువెళ్ళెను. ఆ మునులలో ఒకరైన అత్రి మహాముని కొంత జలమును ఈ గ్రామమునకు తూర్పున ఉత్తరముగా ప్రవహింప జేస్తూ లవణసముద్రమున కలిపినందున ఈ గ్రామమునకు ఉప్పుమిల్లి గ్రామముగా పేరువచ్చినది. ఈ నదిని అత్రిమహాముని తీసుకువచ్చినందుకు ఈ నదికి అత్రీయ గోదావరి అనియు ఉత్తరముగా ప్రవహించుటచే ఉత్తర వాహిని అనియు ఈ నదిని గొప్పరేవుగా పిలిచెడివారు. ఇప్పుడు గొప్పిరేవుగా పిలువబడుచున్నది. ఈ ఆత్రేయ గోదావరి సప్తసాగర యాత్రలలో రెండవది. ఈ గ్రామమునకు దక్షిణ భాగమున అఖండ గౌతమీ గోదావరి తూర్పు దిశగా ప్రవహిస్తూ ఆత్రేయ గోదావరిలో కలియుచున్నది.

త్రేతాయుగమున ఈ ప్రదేశమంతయూ మహారణ్యము కావున ఇందు సీతారామలక్ష్మణులు పితృవాక్య పరిపాలనకై ఈ మహారణ్యమునందు నివశించుచూ లోక సంరక్షరార్థము త్రిపుర సుందరి శంకరులను ప్రతిష్ఠించి పూజించెడివారు. ఆనాటి నుండి ఇచ్చటి తపోనిధులు భక్తులు కూడా ఆత్రేయ గోదావరిలో స్నానము చేసి స్వామిని పూజించి ఆరాధించెడివారు. వారిలో భవానీ అను మహాభక్తురాలు వృద్ధురాలు స్వామిని నిత్యమూ పూజిస్తూ స్మరిస్తూ ఉండెడిది.

ఈమె కొద్దికాలమునకు వృద్ధాప్యములో మరణావస్థలో ఉండి లేవలేనిదై త్రిపురసుందరి శంకరులను నిత్యమూ స్మరిస్తూ ఉండగా త్రిపురసుందరి ఈ ప్రదేశమందు నివశించు భక్తుల యొక్క యోగక్షేమములు తెలుసుకొనుటకై బాలిక రూపములో తిరుగుచూ వారి కష్టములను కాపాడుచూ ఉండెడిది. ఇట్టి సమయమున భక్తురాలైన భవానీ ఇంటికి బాలికరూపంలో వచ్చి ఆమె భక్తిని గ్రహించినదై నీకు ఏమి కావలయును అని అడుగగా ఈమె సాక్షాత్తూ భగవత్ స్వరూపిణి కావచ్చునని భవానీ గ్రహించినదై త్రిపురసుందరీ శంకరులను చూచునటుల వరం ప్రసాదించమని వేడుకొనగా అంతట త్రిపురసుందరి శంకరులు ప్రత్యక్షమయ్యెను. అంతట భవానీ సంతోషసంముగ్దురాలై పరవశించిపోయి మీరు ఇరువురూ కూడా నాయందే ఉండి నా మరణానంతరము నా పేరు మీ నామములో ఒకటిగా సార్థకము చేసి నాకు ముక్తి నొసగుమని వేడుకొనెను.

అందులకు స్వామి ఆనందముగా భక్తురాలికి ఇచ్చిన మాట ప్రకారము ఈ ప్రదేశమునందే నివశిస్తూ శంకరుడు భవానీ శంకరునిగాను త్రిపురసుందరి బాలిక రూపములో తిరుగుచూ భక్తులను ఆదుకొనుటచే బాలా త్రిపురసుందరిగాను పిలువబడుచుండెను. భక్తురాలికి ఇచ్చిన మాట ప్రకారము స్వామి వదిలి వచ్చిన స్థలమును ఇంకనూ గుడి దిబ్బగా పిలువబడుచున్నది. స్వామివారి దివ్య కళ్యాణోత్సవము చైత్రశుద్ధ ఏకాదశి నుండి పాంచాహ్నికంగా జరుగును. ఇదే ఆలయములో లక్ష్మీ నారాయణులు కూడా ప్రతిష్టింపబడి శివకేశవులకు అభేదము గోచరించుచున్నది. ఈ క్షేత్ర స్థిత లింగమూర్తి స్వయంభువుగా ప్రసిద్ధి. ఈ గ్రామంలో ఇంకనూ సుబ్రహ్మణ్యస్వామి ఆలయము, భక్తాంజనేయస్వామి గణపతి ఆలయములు కలవు.

శ్రీ బాలాత్రిపుర సుందరీ సమేత మల్లేశ్వరస్వామి – కుయ్యేరు

అశ్వని నక్షత్రం – తృతీయచరణం

కుయ్యేరు క్షేత్రమును చేరుటకు కాకినాడ, యానాం, ద్రాక్షారామల నుండి కూడా విస్తృతమైన రవాణా సౌకర్యం కలదు. అంతేకాక ఈ ఆలయము ప్రధాన రహదారిపై ఉండుట చేత చేరుట అతిసులభం. ఈ క్షేత్రము అశ్వని నక్షత్రము మూడవ పాదమునకు చెందినది. ఈ జాతకులు ఈ క్షేత్ర స్థిత శ్రీ బాలాత్రిపురసుందరీ సమేత మల్లేశ్వరస్వామిని దర్శించి అర్చనాభిషేకములు నిర్వర్తించిన శుభ ఫలితములు కలుగునని భక్తుల విశ్వాసము. అత్యంత పురాతన క్షేత్రాలలో ఒకటైన ఈ ఆలయం సుమారు రెండువందల సంవత్సరాల క్రితం నిర్మించబడినట్లు తెలుస్తున్నది. అయితే ఆలయం జీర్ణావస్థలోకి వచ్చిన కారణం చేత గ్రామస్థుల సహకారంతో పునఃనిర్మాణం చేపట్టడం జరుగుచున్నది.

అలాగే శివలింగం కూడా కాశీ క్షేత్రము నుండి తీసుకుని వస్తున్నట్లు తెలిసినది. ప్రస్తుతం నిర్మాణంలో వున్న ఈ ఆలయం 08-03-2015 నుండి పునఃప్రతిష్ఠతో సహా ప్రారంభం కానున్నట్లు తెలిసినది. ఈ గ్రామంలో రుక్మిణీ సత్యభామా సమేత శ్రీమదనగోపాలస్వామి వారి ఆలయం మరియు శ్రీ సీతారామస్వామివారి ఆలయము కలవు. స్వామివారి దివ్య కళ్యాణోత్సవము చైత్రశుద్ధ ఏకాదశి నుండి పాంచాహ్నికంగా జరుగుతుంది. ఇదికాక ఈ క్షేత్రములో శరన్నవరాత్రులు, గణపతి నవరాత్రులు మరియు సుబ్రహ్మణ్యషష్ఠి వైభవోపేతంగా నిర్వహించబడును. అంతేకాక మాసోత్సవములు ఆయనోత్సవములు జరుగును.

శ్రీ పార్వతీ సమేత మల్లేశ్వరస్వామి – దుగ్గుదూరు

అశ్వని నక్షత్రం – చతుర్థచరణం

దుగ్గుదూరు క్షేత్రం కుయ్యేరు గ్రామానికి సమీపంలో గొల్లపాలెం – కుయ్యేరు రహదారి యందు కలదు. ఈ గ్రామం చేరుటకు కాకినాడ నుండి బస్సు సౌకర్యం మాత్రమే గాక గొల్లపాలెం, కుయ్యేరు గ్రామాలనుండి ఆటో సౌకర్యం కూడా గలదు. దుగ్గుదూరు గ్రామంలో వేంచేసియున్న శ్రీపార్వతీ సమేత మల్లేశ్వరస్వామి క్షేత్రం నక్షత్ర శివాలయాలలోని అశ్వని నక్షత్రం – నాలుగవ పాదానికి చెందినదిగా చారిత్రిక కథనం.

అందువల్ల ఆ జాతకులకు ఈ క్షేత్రదర్శనం, అర్చనం విశేష ఫలాన్నిస్తాయని భక్తుల ప్రగాఢ విశ్వాసం. ఆత్రేయ గోదావరి తీరాన విలసిల్లిన ఈ దుగ్గుదూరు గ్రామం యొక్క నామం విషయంలో ఒక ఆసక్తికరమైన కథనం కలదు. దుగ్ధమనగా క్షీరం (పాలు) స్వచ్చతకు, శాంతికి ప్రతీకగా చెబుతారు. దానికి తగ్గట్టుగానే ఈ గ్రామంలో పాడిపరిశ్రమ విశేషంగా జరుగుటయేగాక, ప్రజలు కూడా శాంతికాముకులుగా యుండుట విశేషం. దుగ్ధము నుండి ఈ గ్రామానికి దుగ్దూరు నామం కలిగి పిదప వ్యవహారంలో దుగ్గుదూరుగా మారినదట.

ఈ క్షేత్రాన కోలువైయున్న గణపతికి కామ్య గణపతియని పేరు. దానికి తగ్గట్టుగానే ఈ గణపతి సర్వసిద్దిదాయకుడు. ఏ సంకల్పంతోనయితే స్వామిని నిష్కల్మష భక్తితో త్రికరణశుద్ధిగా సేవిస్తారో ఆ సంకల్పసిద్ధి జరిగినట్లు దృష్టాంతములు గలవు. ఈ ఆలయం సుమారు 250సంవత్సరములకు పూర్వము పిఠాపురం సంస్థానాధీశులు రేచర్ల గోత్రజ్ఞులు రావు గంగాధర రామారావుగారిచే పునర్నిర్మితమయినది. ఆ కారణం చేతనే నేటికిని ఈ ఆలయమున ప్రథమపూజ వారి పేరున జరుగుతుంది. ఇచ్చటి ఈశ్వర రూపం అఘోర రూపంగా చెబుతారు. అంతేకాక పరమేశ్వర స్వరూపమునకు మల్లిఖార్జున నామధేయం కూడా ఆలయ పునఃనిర్మాణం సమయంలో పిఠాపురాధీశులచే స్థిరపరచబడినది.

మల్లికార్జునుడు సత్వగుణ స్వరూపుడు అందువల్ల ఈ స్వామి దర్శనం, అర్చనల వలన సత్వగుణాన్ని పెంపొందిస్తాయని భక్తజనుల విశ్వాసం. స్వామివారి ప్రత్యద్భోత్సవం (దివ్యకల్యాణం) వైశాఖశుద్ధ ఏకాదశి నుండి పాంచాహ్నికంగా శైవాగమ సిద్ధాంతపరంగా జరుగుతుంది. అలాగే ఆరుద్ర నక్షత్రాల రోజులలో విశేష పూజలు నిర్వహించబడతాయి. ఈ క్షేత్రం ఆత్రేయ గోదావరి తీరాన గలదు. ఈ ఆలయానికి వామపార్శ్వాన రుక్మిణీ సత్యభామా సమేత శ్రీ వేణుగోపాలస్వామి ఆలయం మరియు పశ్చిమంగా ముప్పిళ్ళమ్మ అమ్మవారి ఆలయాలు వున్నాయి.

శ్రీ ఉమా సమేత సోమేశ్వరస్వామివారి దేవస్థానం – కోలంక

భరణినక్షత్రం – ప్రథమ చరణం

ఈ క్షేత్రము యానాం ద్రాక్షారామ ప్రధాన రహదారిపై కోలంక గ్రామమున కలదు. ప్రధాన రహదారి నుండి సుమారు కిలోమీటరు లోపల ఈ ఆలయమునకు చేరవచ్చును. ఈ ఆలయము కేవలం నక్షత్ర శివాలయం మాత్రమే కాక అష్టసోమేశ్వర క్షేత్రములలో ఒకటిగా ప్రసిద్ధి. ఈ ఆలయమును కోటిపల్లి – యానాం మార్గం ద్వారా చేరవచ్చును. రోడ్డు రవాణా సంస్థవారి బస్సు సౌకర్యం కలదు.

భరణి నక్షత్రము మొదటి పాదమున జన్మించినవారు ఈ ఆలయము సందర్శించి అచటి స్వామికి అర్చనాభిషేకములు చేసిన యెడల వారి విపత్తులు తీరి సంకల్పసిద్ధి కలుగుతుందని విశ్వాసము. ఈ క్షేత్రము పైన తెలిపినట్లు చంద్ర ప్రతిష్టితమైన అష్టసోమేశ్వర క్షేత్రములలో ఒకటిగా తూర్పుకోణమున కోలంక గ్రామంలో ప్రతిష్టించబడినది. ఇచ్చటి స్థలపురాణం ప్రకారం అనేక శతాబ్దాలుగా వున్న ఈ క్షేత్రము 9వ శతాబ్ద కాలంలో చాళుక్య భీమునిచే పునరుద్దరింపబడినట్లుగా తెలియుచున్నది. తదనంతరం పెద్దాపురం రాజుగారైన శ్రీవత్సవాయి తిమ్మజగపతిరాజుగారు ఈ ఆలయాన్ని పునరుద్ధరించారట. ఈ ఆలయమునకు చేర్చి కేశవస్వామివారి ఆలయము కలదు.

ఈ రెంటికీ మధ్య ఖాళీ స్థలములో క్రీ.శ.1986 సంవత్సరంలో శ్రీశ్రీశ్రీ లక్ష్మణ యతీంద్రులవారి దివ్య ఆశిస్సులతో శ్రీదేవి భూదేవి సమేత వెంకటేశ్వరస్వామి ప్రతిష్ట, శ్రీ అట్లూరి సత్యనారాయణ రాజు, శ్రీమతి సత్యనారాయణమ్మ దంపతుల చేతులమీదుగా జరిగినది. తదుపరి 1999వ సంవత్సరములో ఆలయ పునరుద్ధరణ శివలింగ పునఃప్రతిష్టతో పాటు పార్వతీదేవి, విఘ్నేశ్వరుడు, నంది, ధ్వజస్తంభము ఇత్యాదుల పునఃప్రతిష్ట జరిగినది. శ్రీవెంకటేశ్వరస్వామి ఆలయము శ్రీవాణీ మాతాజీ సత్సంగము వారి ఆధ్వర్యంలో నిర్మింపబడి నిర్వహించబడుచున్నది. ఆలయము వెనుక భాగమున శ్రీవత్సవాయి తిమ్మజగపతిరాజుగారి పేరున వాహనశాల నిర్మాణం జరిగినది.

ఇచ్చట ఉమా సమేత సోమేశ్వరస్వామి వారికి మరియు శ్రీదేవి, భూదేవి సమేత కేశవస్వామి వారికి వైశాఖ శుద్ధ ఏకాదశి నుండి పాంచాహ్నికంగా ఏకముహూర్తములో కళ్యాణోత్సవాలు నిర్వహించబడతాయి. అలాగే శ్రీదేవి, భూదేవి సమేత వెంకటేశ్వరస్వామి వారికి ఫాల్గుణశుద్ధ ఏకాదశి నుండి కళ్యాణోత్సవం జరుగుతుంది.

శ్రీ ఉమా సమేత కృపేశ్వరస్వామి వారి దేవస్థానం – ఇంజరం

భరణినక్షత్రం – ద్వితీయ చరణం

ఈ క్షేత్రం యానాం – కోటిపల్లి ప్రధాన రహదారిపైన కలదు. ఈ ఆలయం చేరుటకు అధికశ్రమ అవసరంలేదు. ప్రధానరహదారిపైన కుడివైపున ఉండుట వల్ల యానాం నుండి కోటిపల్లి వైపు వెళ్ళు బస్సుగాని, ఆటోగాని ఎక్కి ఇంజరం శివాలయం అని చెబితే సరిపోతుంది.భీమమండలంలో వేంచేసియున్న శ్రీ ఉమాసమేత కృపేశ్వరస్వామివారిని దర్శించుకోవడం సర్వపాపహరంగాను, సంపత్కరంగాను భావించడం జరుగుతున్నది, ముఖ్యంగా భరణి నక్షత్రం – ద్వితీయ చరణంలో జన్మించిన వారికి ఈ ఆలయస్థితి శివస్వరూపదర్శనం, అర్చనాభిషేకాదుల వలన విశేష ఫలం లభించగలదని భక్తజనుల విశ్వాసం.

ఈ ఆలయ నిర్మాణం సుమారు నాలుగు శతాబ్దములకు పూర్వం అక్కన్నమాదన్నల కాలంలోనే జరిగినట్లు తెలియుచున్నది. ఈ ఆలయ ప్రాంగణంలో గణపతి, సుబ్రహ్మణ్యేశ్వరులతో పాటు, నవగ్రహమంటపము కలవు, అంతేకాక ఆలయ ప్రాంగణంలో శ్రీసీతారామస్వామివారి ఆలయం కలదు. శివాలయం ఎదురుగా ఆంజనేయస్వామివారు కొలువై వుండటం ఈ క్షేత్ర విశేషం. ఈ ఆలయానికి జేర్చి పురాతనమయిన మదనగోపాలస్వామివారి మందిరం గలదు. ఆలయ కుడ్యములపై ద్వాదశ జ్యోతిర్లింగములు, మరియు నవదుర్గల చిత్రములు అందంగా చెక్కబడియున్నవి. ఆలయప్రాంగణంలో ధ్యానముద్రలో యున్న శివుని విగ్రహం కన్నుల పండుగగా దర్శనమిచ్చును.

శ్రీగంగా సమేత వ్యాసేశ్వరస్వామివారి దేవస్థానం – పల్లిపాలెం

భరణి నక్ష్హత్రం – తృతీయ చరణం

శ్రీ పార్వతీ హృదయ పంకజ భాస్కరాయగంగామనః కుసుమగుచ్చకపుష్పదాయనిత్యంసమాశ్రిత జనావనదీక్షితాయవ్యాసేశ్వరాం జగతాంపతయేనమస్తే.పై పద్యము పీఠికాపుర ఆస్థాన కవివర్యులు, శతావధాని కీ.శే. ఓలేటి వెంకటరామశాస్త్రిగారి వ్యాసేశ్వరాష్టకంలోనిది. ఈ పద్యం ఆలయం కుడ్యంపైన చెక్కబడియుండటం విశేషం. ఇక ఈ క్షేత్రం ఇంజరం గ్రామమునకు సమీపంలో కలదు. క్షేత్రమును చేరుటకు కాకినాడ నుండి రాష్ట్ర రోడ్డు రవాణా సంస్థవారి బస్సు సౌకర్యం ఉన్నను ఇంజరం గ్రామం నుండి ఆటో లేదా ఇతర రవాణా సాధనాల ద్వారా పల్లిపాలెం జేరుట సులభం. వ్యాసమహర్షి ద్వారా ప్రతిష్టితమయినట్లుగా భావించబడుతున్న ఈ క్షేత్రం భరణి నక్షత్రం, తృతీయ పాదంలో జన్మించిన వ్యక్తులకు విశేష ఫలాన్నిస్తుందని భక్తుల విశ్వాసం. ప్రస్తుత ఆలయం సుమారు రెండు శతాబ్దములకు పూర్వం నిర్మితమయినట్లు తెలియుచున్నది. తదుపరి అనేక మంది దాతల సహకారంతో ఆలయ అభివృద్ధి కార్యక్రమములు జరిగినట్లు తెలియుచున్నది.

ఆలయమునకు ఉత్తరంగా ఆత్రేయ గోదావరినది ప్రవహిస్తున్నది. పశ్చిమాభిముఖంగా శివుడు ఉండడంతో కాశీ సమక్షేత్రంగా భావిస్తారు. ఈశాన్యంగా పుష్కరిణి కలదు. దక్షిణదిశలో ఔదుంబర వృక్షం వుండటం ఇక్కడి విశేషం. సంతానలేమిచే బాధపడేవారు ఈ క్షేత్రంలో అర్చనాభిషేకాదుల వల్ల ఫలితం కలుగగలదని భక్తుల విశ్వాసం. అంతేకాక అపరిష్కృతమయిన సమస్యలు వ్యాసేశ్వరస్వామివారి కృపచేత పరిష్కారం అవుతాయని కథనం. ఈ క్షేత్రంలోని మరొక విశేషం ఏమనగా ఇక్కడి శివలింగంపై తృతీయనేత్రం మాదిరిగా వుండటం అభిషేక సమయాలలో శివలింగం తాకిన వారికి విద్యుత్తు తాకినప్పుడు మాదిరిగా జలదరింపు కలుగుతుందట. ఈ ఆలయంలోని నవగ్రహ మంటపంలో ఆంజనేయస్వామి వారి విగ్రహం ప్రతిష్టించారు. ఇవికాక ఈ ఆలయ ప్రాంగణంలో గణపతి, దత్తాత్రేయస్వామి కొలువై యున్నారు. వైశాఖశుద్ధ ఏకాదశికి స్వామివారి కల్యాణం అత్యంత వైభవంగా జరుగుతుంది.

శ్రీపార్వతీ సమేత శ్రీరామలింగేశ్వరస్వామివారి దేవస్థానం – ఉప్పంగల

భరణి నక్షత్రం – చతుర్థ చరణం

ఈక్షేత్రము యానాం – ద్రాక్షారామ రహదారిలోని ఇంజరం గ్రామమునకు సుమారు 5, 6 కిలోమీటర్ల దూరమున కలదు. బస్సు సౌకర్యంలేని కారణము చేత ఈ గ్రామమునకు చేరుట ప్రయివేటు వాహనముల (ఆటో, కారు)ద్వారా చేరవలయును. ఈ క్షేత్రము భరణి నక్షత్ర నాలుగవ పాదంలో జన్మించినవారికి అత్యంత శుభప్రదమని విశ్వాసము, ఈ క్షేత్రమునందు దర్శనము మరియు అర్చనాభిషేకముల వలన పైన చెప్పబడిన జాతకులు విశేష ఫలములు పొందగలరని నమ్మిక. ఈ శివలింగ ప్రతిష్ఠ త్రేతాయుగమునందు శ్రీరామచంద్రమూర్తిచే జరిగినట్లు కథనం. శ్రీరామచంద్రుడు దండకారణ్యమున పాదాచారియై ప్రయాణము చేయు సమయములో ఇచ్చటి కోనేటియందు సాయం సంధ్యావందనం చేసుకున్న తరువాత సైకత లింగ ప్రతిష్ఠ చేసినట్లు కథనం.

ఈ గ్రామము యొక్క నామము విషయములో కూడా ఒక ఆసక్తికరమైన కథనం కలదు. పూర్వము శూర్పణఖ శ్రీరామచంద్రుని వరించి వచ్చినప్పుడు లక్ష్మణుడు ఆమె ముక్కు మరియు చెవులు ఖండించగా అవి ఈ ప్రాంతమున పడినట్లు చెబుతారు. చుప్పనాతి అంగములు పడిన క్షేత్రము గావున ఈ గ్రామమునకు తొలుత “చుప్పంగల” అను నామం ఉండెడిదట. ఉత్తరోత్తర అదియే ఉప్పంగలగా మారినదట. ఈ ఆలయమునందలి మరియొక విశేషమేమనగా ఇచ్చటి నందీశ్వర విగ్రహము తిరుగునట్లుగా నిర్మించబడినది (త్రిప్పుడునంది). గ్రామమునందు ఎవరైనా స్త్రీ ప్రసవవేదన పడుచు ప్రసవము కష్టమైన ఎడల ఆ స్త్రీ యొక్క భర్త నంది ముఖమును ఆమె ఇంటివైపు త్రిప్పిన యెడల ఆ స్త్రీకి సుఖప్రసవము జరుగుతుందని నమ్మకము. దీనికి దృష్టాంతకంగా కొన్ని సంఘటనలు అచట స్థానికులు తెలియజేశారు.ఈ ఆలయమునకు కీర్తిశేషులు శ్రీమతి మన్యంగారు స్థలమును వితరణ చేసినట్లుగా తెలుస్తోంది.

శ్రీ మీనాక్షీదేవి సమేత నీలకంఠేశ్వరస్వామి – నీలపల్లి

కృత్తిక నక్షత్రం – ప్రథమ చరణం

ఈ క్షేత్రము కాకినాడ – యానాం ప్రధాన రహదారిపై కలదు. ఆలయమునకు చేరుటకు నీలపల్లి బస్సుస్టాపు వద్ద దిగి లోనికి వెళ్ళవలెను.ఈ క్షేత్రము కృత్తిక నక్షత్రం మొదటి పాదమునకు చెందినది. ఈ జాతకులు ఈ ఆలయ స్థిత శివమూర్తిని దర్శించుకుని అర్చనాభిషేకములు నిర్వహించినచో వారికి అరిష్ట నివృత్తి జరిగి సుఖవంతులగుదురని భక్తుల విశ్వాసము. ఈ గ్రామము యొక్క నామధేయము కూడా క్షేత్ర స్థిత నీలకంఠేశ్వరస్వామి పేరుమీద నీలపల్లి అయినట్లు ఒక కథనం.

ప్రస్తుతం ఆలయం పునర్నిర్మాణంలో ఉన్నది. ఆలయమందలి మూలమూర్తులను ఒక ప్రక్కగా తాత్కాలిక మందిరమందు ప్రతిష్టించిరి. జీర్ణమైన పూర్వాలయము 500 సంవత్సరముల క్రితం నిర్మించబడెనని తెలియుచున్నది. ఈ ఆలయమును జేర్చి విశాల ప్రాంగణంలో శ్రీ సీతారామస్వామివారు మరియు శ్రీదేవి, భూదేవి సమేత వెంకటేశ్వరస్వామి కొలువై వున్నారు. ఈ ఆలయ ప్రాంగణమునకు శ్రీసీతారామ సమేత వెంకటేశ్వర ఆలయముగా నామకరణం జరగడం విశేషం. శ్రీ నీలకంఠేశ్వరస్వామివారి దివ్య కళ్యాణోత్సవము మాఘశుద్ధ ఏకాదశి నుండి పాంచాహ్నికంగా జరుగును. ఈ క్షేత్రమునందు శరన్నవరాత్రులు, మరియు సుబ్రహ్మణ్యషష్ఠి తీర్థము విశేషంగా నిర్వహించబడును.