శ్రీ ఉమా పార్వతీ సమేత అగస్త్యేశ్వరస్వామి – పులగుర్త

హస్త నక్షత్రం – తృతీయ చరణం

ఈ క్షేత్రము రామచంద్రాపురం మండపేట ప్రధాన రహదారిపై మాచవరం దాటిన పిదప చేరవచ్చును. పులగుర్త బస్ స్టాప్ నుండి వంతెన దాటి సుమారు కిలోమీటరు దూరంలో ఆలయము కలదు. మండపేట పట్టణం నుండి ప్రైవేటు వాహనాల (ఆటో) ద్వారా కూడా చేరవచ్చును. హస్త నక్షత్రం మూడవ పాదమునకు చెందినవారు ఈ ఆలయాన్ని సందర్శించి అర్చనాభిషేకాదులు నిర్వర్తించిన యెడల ఆ జాతకులు విశేష ఫలితములను పొందగలరని భక్తుల విశ్వాసం.

అగస్త్య ప్రతిష్ఠగా భావింపబడుతున్న ఈ ఆలయ పునఃనిర్మాణం జరుగుతున్న కారణంగా శివలింగము, అమ్మవారు అంతరాలయంలో గణపతి మరియు సుబ్రహ్మణ్యేశ్వరస్వామి వారి అర్చామూర్తులను సమీపమున ఒక బాలాలయంలో ప్రతిష్టించడం జరిగింది. ఈ గ్రామంలో శ్రీ రుక్మిణీ సత్యభామా సమేత వేణుగోపాలస్వామి, గణపతి మరియు ఆంజనేయస్వామివారల ఆలయములు కలవు. స్వామివారి దివ్య కళ్యాణోత్సవము ఫాల్గుణ శుద్ధ ఏకాదశి నుండి పాంచాహ్నికంగా జరుగుతుంది. శరన్నవరాత్రులు మరియు సుబ్రహ్మణ్యషష్ఠి ఘనంగా నిర్వహించబడతాయి.